A figura do comuneiro resulta moi relevante no noroeste peninsular por canto, a finais do ano 2018, había un total de 122.734 comuneiros en Galicia, sendo maior o número medio de comuneiros nas comunidades de montes de Pontevedra (sobre todo no sur) e moito menor nas provincias de Ourense e Lugo.
Requisitos a cumprir pola persoa comuneira
A comunidade está integrada por comuneiros e comuneiras que, para selo, deben cumprir os seguintes requisitos:
Ter residencia habitual en casa aberta na parroquia ou lugar titular do monte;
Ser titular de unidades económicas na parroquia ou lugar titular do monte;
Realizar algunha actividade relacionada co monte veciñal.
Pero tendo en conta a xurisprudencia, as persoas comuneiras dunha determinada comunidade de montes serán aqueles veciños residentes con casa aberta na demarcación histórica da parroquia tradicional correspondente, con independencia da delimitación administrativa actual e da súa actividade económica.
Dereitos das persoas comuneiras
Na normativa que afecta ás comunidades de montes veciñais en man común contémplanse, entre outros, os seguintes dereitos das persoas comuneiras:
Defender os intereses da comunidade, incluíndo o reintegro dos gastos que lle ocasione a defensa xurídica da comunidade, sempre que prosperen as súas pretensións ou fose aprobado pola Asemblea Xeral[1];
Solicitar certificación do contido do Libro rexistro de comuneiros, do Libro de actas e do Libro de contas da comunidade[2];
Xunto con outras persoas comuneiras que representen, cando menos, o 20 % dos membros da comunidade, solicitar a convocatoria dunha Asemblea Xeral extraordinaria[3];
Recibir notificación escrita coa convocatoria e a orde do día dos asuntos a tratar nunha Asemblea Xeral da comunidade[4];
Poder delegar noutro comuneiro para asistir a unha Asemblea Xeral[5].
A perda da condición de persoa comuneira
A diferente xurisprudencia reincide na consideración de que non existe ningún motivo para xustificar a expulsión dun comuneiro salvo que deixe de cumprir os requisitos para selo (entre eles e principalmente, o de ter residencia habitual na área xeográfica vinculada co monte veciñal). Así se viu referendado polo establecido na Lei 2/2006, de dereito civil de Galicia, onde se especifica que a condición de comuneiro só se perderá por deixar de cumprir os requisitos esixidos para iso.
—
[1] Artigo 17 da Lei 13/1989, de montes veciñais en man común e artigo 45 do Decreto 260/1992, Regulamento da lei de montes veciñais en man común.
[2] Artigo 38 do Decreto 260/1992, Regulamento da lei de montes veciñais en man común.
[3] Artigo 14.2 da Lei 13/1989, de montes veciñais en man común e artigo 40.2 do Decreto 260/1992, Regulamento da lei de montes veciñais en man común.
[4] Artigo 14.4 da Lei 13/1989, de montes veciñais en man común e artigo 41.1 do Decreto 260/1992, Regulamento da lei de montes veciñais en man común.
[5] Artigo 14.5 da Lei 13/1989, de montes veciñais en man común e artigo 41.2 do Decreto 260/1992, Regulamento da lei de montes veciñais en man común.
Esta web usa cookies para asegurarse de ofrecer a mellor experiencia de usuario. Por favor, preme no botón "Acepto" para continuar navegando por esta web. Gracias!AceptoPolítica de cookies