Declaración de estado de grave abandono

Declaración de estado de grave abandono

Dentro das competencias que se reservan para a Consellería do Medio Rural está a de declarar un monte veciñal en estado de grave abandono ou degradación. Esta situación darase cando, de modo manifesto, o monte veciñal sufrise unha grave deterioración ecolóxica, non sexa explotado de acordo cos seus recursos ou sufra unha extracción abusiva deles.

Para garantir que non se use de forma arbitraria esta potestade, de xeito periódico estableceranse os indicadores que servirán para a determinación do estado de grave abandono ou degradación. Segundo o establecido no artigo 28 da Lei 13/1989, de montes veciñais en man común, estes indicadores estableceranse baseándose, de xeito fundamental, nos seguintes criterios:

1. O grao de aproveitamento da extensión superficial;
2. O grao de manifesto desuso;
3. O grao de acomodación aos aproveitamentos establecidos no instrumento de ordenación;
4. O carácter depredador das actividades extractivas dos recursos;
5. O perigo manifesto de degradación das terras.

Polo tanto, por razóns de utilidade pública e interese xeral, podería declararse un monte veciñal en estado de grave abandono ou degradación, o que implicaría a execución dun instrumento de ordenación nese monte.