Servizos

A Xunta de Goberno establece anualmente os obxectivos e as liñas de traballo da Asociación, controla a súa economía e exerce a representación institucional dos propietarios forestais e comunidades de montes ante as administracións, industrias forestais e foros nacionais e internacionais.

O equipo técnico e administrativo da AFG ocúpase de prestarlle aos silvicultores os servizos necesarios para facer unha boa xestión do monte. Entre os servizos máis demandados polos socios destacan: asesoramento e asistencia técnica en materia forestal, xestión de montes veciñais e de montes particulares, asesoramento en procedementos xurídicos e administrativos no ámbito forestal, asesoramento en fiscalidade forestal, xestión da venda da madeira, organización de poxas, realización de informes técnicos e peritacións, tramitación de axudas públicas e asistencia técnica para a constitución de agrupacións forestais.

Un dos servizos que maior acollida ten entre os socios é o de valoración de madeira. O informe que se lle entrega ao propietario permítelle coñecer a cantidade e calidade da madeira que vai vender e tamén o seu valor no mercado.

A AFG ofrece a súa asistencia técnica para conseguir o certificado de xestión forestal sostible segundo os sistemas PEFC e FSC que posibilitan a venda de madeira e produtos forestais certificados en todos os mercados.

Ao longo do ano, a AFG organiza numerosas actividades relacionadas coa silvicultura e a xestión de montes; entre elas destacan a realización de viaxes técnicas, a asistencia a feiras forestais, a organización de congresos, simposios e seminarios de carácter forestal. No ámbito da formación, a AFG imparte cursos ós seus socios sobre os principais aspectos da silvicultura e da xestión de montes.

A AFG acumula unha ampla experiencia en repoboación forestal e no manexo de todo tipo de montes, tanto produtivos como de conservación. Máis de 15.000 ha de novos montes foron creados en Galicia co apoio da AFG.

O equipo técnico participa activamente en proxectos de investigación e cooperación nacionais e internacionais coa finalidade de trasladar ao monte as principais innovacións en materia de silvicultura. Toda esta experiencia permítelle á AFG dispoñer dos seus propios modelos de silvicultura e métodos de repoboación que garanten o éxito dos investimentos no monte.

Por outra parte, todos os socios da AFG benefícianse tamén de:

• A revista O Monte de periodicidade variable e gratuíta para os socios, cunha tirada de 2.500 exemplares. Con información actualizada sobre prezos da madeira, axudas e subvencións, técnicas silvícolas, sanidade forestal, normativas…
• O boletín dixital mensual Novas AFG gratuíto para os socios
• Noticias no Facebook da AFG
• A publicación de libros e manuais sobre silvicultura, fiscalidade forestal e xestión de montes.
• Da biblioteca técnica con consulta dende a web, cun amplo fondo bibliográfico que inclúe os principais libros e revistas do eido forestal.

De acordo coa demanda xeneralizada dos membros da AFG, a finais do ano 2002 a Asociación, co apoio do proxecto Eurosilvasur, creou a empresa de servizos SELGA, Compañía Galega de Silvicultores, S.L., dedicada á realización de traballos silvícolas e á prestación de servizos de enxeñería forestal. A empresa SELGA, propiedade de todos os socios da AFG ten unha dedicación moi especial ao comercio da madeira e ao desenvolvemento de enerxías renovables asociadas ao monte.

A través de SELGA, os membros da AFG poden dispoñer dos seguintes servizos:

• A xestión de montes, de particulares e veciñais, e a supervisión e dirección dos traballos nos montes por encargo dos socios.
• A elaboración de proxectos de ordenación e plans técnicos de xestión de montes.
• A certificación forestal a través de Selga Xestión Forestal Sostible que prepara e xestiona a obtención da certificación da xestión forestal baixo os dous sistemas internacionais: PEFC e FSC.
• A elaboración de proxectos técnicos forestais: repoboacións, tratamentos silvícolas e construción de infraestruturas forestais.
• A restauración e recuperación de montes e ecosistemas forestais naturais.
• A elaboración de planos de terreos e cartografía de montes.
• A execución de traballos forestais: plantacións, forestación de terras agrarias, aplicación de tratamentos contra pragas e enfermidades forestais e realización de podas e rareos.
• A comercialización de madeira: xestión de vendas e organización de poxas.
• O desenvolvemento de proxectos de enerxías renovables.