Estatutos da Asociación Forestal de Galicia

TÍTULO I

DA DENOMINACIÓN, NATURALIDADE, ÁMBITO, DURACIÓN E DOMICILIO

 

Artigo 1º.- Denominación, obxecto e normativa

1. Procédese a adaptar os estatutos da asociación denominada ASOCIACIÓN FORESTAL DE GALICIA, con CIF nº G-15112121, inscrita o ano 1986 co número 68.382 no Rexistro de Asociacións do Ministerio de Interior e cunha modificación de estatutos inscrita no Rexistro Provincial de Asociacións co protocolo nº 1.794/1ª e con data de resolución do 18 de xuño de 2001.
2. A ASOCIACIÓN FORESTAL DE GALICIA (en diante AFG), é unha asociación sen ánimo de lucro, autónoma e independente que, no ámbito territorial de Galicia, agrupa a propietarios de montes particulares, comunidades de montes veciñais en man común e a titulares de montes. Ten por obxecto contribuír á defensa e promoción dos intereses sociais e económicos dos seus socios, promovendo a xestión sostible dos bosques de Galicia e a mellora da silvicultura.
3. A asociación rexerase segundo os principios democráticos, polo establecido na Constitución, pola Lei orgánica 1/2002, do 22 de marzo, reguladora do dereito de asociacións, pola demais lexislación existente en materia de asociacións que lle sexa aplicable, o resto do ordenamento xurídico e polo disposto nos presentes estatutos.

 

Artigo 2º.- Naturalidade e capacidade

A AFG:

1. Ten personalidade xurídica e capacidade de obrar plenas.
2. Poderá promover e asumir os procedementos que sexan oportunos e exercer os dereitos e accións que lle correspondan ante calquera autoridade, organismo e xurisdición.
3. Posúe a capacidade necesaria para realizar os actos e contratos encamiñados ó cumprimento dos seus fins.
4. Poderá adherirse, federarse ou asociarse con outras entidades nacionais e estranxeiras de propietarios forestais, así como participar en calquera outras, logo de acordo da Xunta de Goberno que haberá de ser ratificado pola Asemblea Xeral.

 

Artigo 3º.- Ámbito e duración

1. A asociación constitúese por tempo indefinido e só se disolverá, conforme a estes estatutos, pola vontade dos socios expresada en Asemblea Xeral Extraordinaria ou polas causas previstas na lexislación vixente.
2. A AFG en función dos seus fins e da situación do seu domicilio social, exercerá fundamentalmente as súas actividades no ámbito territorial da Comunidade Autónoma de Galicia.

 

Artigo 4º.- Domicilio

1. A AFG ten o seu domicilio principal e permanente en Santiago de Compostela, rúa do Vilar, nº 33, 1º, CP 15705.
2. Poderanse utilizar outros locais asociativos adicionais noutras localidades, mediante acordo da Asemblea Xeral a proposta da Xunta de Goberno, que terá atribucións para cambiar, tanto o domicilio como os locais, e daralle conta do seu acordo ó organismo encargado do Rexistro de Asociacións. 

 

TÍTULO II

DOS FINS DA ASOCIACIÓN

 

Artigo 5º .- Fins da asociación

Os fins da asociación son:

1. Agrupar os propietarios e titulares de predios forestais de Galicia.
2. Representar os seus membros ante as administracións, entidades, corporacións e institucións nacionais e internacionais, do ámbito forestal.
3. Contribuír á elaboración de políticas forestais acordes cos intereses dos silvicultores galegos.
4. Mellorar en Galicia a produción forestal en cantidade e calidade, incrementando a rendibilidade dos montes.
5. Asegurarlles ós seus socios información, asesoramento e asistencia técnica no ámbito silvícola.
6. Informar a Administración sobre a lexislación que puidera afectar á propiedade forestal, á práctica da silvicultura e, en xeral, ós montes galegos e ós produtos forestais.
7. Apoiar e impulsar a investigación forestal e propoñer liñas e proxectos de investigación que respondan ás necesidades dos silvicultores galegos.
8. Fomentar as iniciativas e suxerir propostas que melloren a estrutura da propiedade forestal en Galicia dirixidas a conseguir unidades de explotación tecnicamente axeitadas.
9. Divulgar e fomentar os coñecementos e as técnicas dirixidas a conseguir unha xestión sostible dos recursos forestais en Galicia.
10. Desenvolver labores de formación que contribúan a incrementar os coñecementos e a capacidade de xestión no ámbito forestal.
11. Promover iniciativas que contribúan a aumentar o valor engadido dos bens, produtos e recursos xerados nos montes galegos.
12. Promover e realizar actividades pola defensa do medio ambiente e a conservación da natureza, incluíndo a formalización de acordos de custodia do territorio para a conservación do patrimonio natural e a biodiversidade.
13. Desenvolver todas aquelas actividades compatibles cos fins mencionados, os estatutos e a lexislación vixente.

Os beneficios que se obteñan por calquera concepto destinaranse exclusivamente ó cumprimento destes fins, sen que se poidan repartir entre os socios nin outras persoas físicas ou xurídicas con interese lucrativo. 

 

TÍTULO III

DOS SOCIOS

 

Artigo 6º.- Requisitos e procedemento de adquisición da condición de socio

1. Poderán pertencer á AFG todos os propietarios forestais privados, de montes particulares e de montes veciñais en man común, e os titulares de explotacións forestais, sexan persoas naturais ou xurídicas, por si mesmos ou a través da súa legal representación, sempre que os seus montes estean situados en Galicia. Non obstante, tamén poderán pertencer á AFG aquelas entidades con personalidade xurídica propia para o cumprimento dos seus fins, que aínda que carezan de titularidade de propiedades forestais ou explotacións forestais, agrupen a outras persoas ou entidades que na súa maioría dispoñan desa titularidade e compartan os fins da AFG.

Así mesmo poderán pertencer á AFG, as persoas naturais ou xurídicas nas que concorran os supostos previstos no artigo 7º dos Estatutos aínda que carezan de titularidade de propiedades ou explotacións forestais.

2. O ingreso na asociación terá carácter voluntario.
3. Para adquirir a condición de socio será necesario solicitalo por escrito dirixido á asociación, asumindo explicitamente o cumprimento das disposicións estatutarias que a rexen.
4. A admisión será acordada pola Xunta de Goberno, que poderá denegala mediante resolución debidamente motivada.
5. A asociación levará un rexistro de socios no que figurarán todos os membros pertencentes á entidade e onde se anotarán as altas e baixas que se produzan.

 

Artigo 7º.- Outros socios: socios de honra e protectores, e socios adheridos

Poderán ser socios de honra e protectores as persoas físicas ou xurídicas, sexan nacionais ou estranxeiras, que a xuízo da Asemblea Xeral e a proposta da Xunta de Goberno reúnan méritos que os fagan acredores desta distinción.

1. Poderán ter a consideración de socios de honra aquelas persoas físicas ou xurídicas que polas súas relevantes contribucións no ámbito da silvicultura, a ecoloxía, ou en xeral nas disciplinas relacionadas co sector forestal sexan acredoras de tal consideración, a xuízo da Asemblea Xeral e a proposta da Xunta de Goberno.
2. Poderán ter a condición de socios protectores aquelas persoas ou entidades que, a xuízo da Asemblea Xeral e a proposta da Xunta de Goberno, axuden de xeito notable ó desenvolvemento dos fins da asociación.
3. Poderán ser socios adheridos as persoas físicas ou xurídicas, sexan nacionais ou estranxeiras que formen parte como membros integrantes de pleno dereito de calquera comunidade de montes veciñais en man común, asociación ou organización que á súa vez sexa socia da AFG, así como as persoas físicas ou xurídicas adscritas ós sistemas de certificación PEFC e FSC do grupo Selga.
4. Os socios de honra e protectores, así como os socios adheridos, terán o dereito de participar nos actos e actividades da asociación pero estarán eximidos dos dereitos e deberes que figuran nos apartados 1 e 2 do artigo 8º.
5. A condición de socio de honra e protector poderá ser retirada por acordo da Asemblea Xeral a proposta da Xunta de Goberno.

 

Artigo 8º.- Dereitos e deberes dos socios

1. Os socios teñen os seguintes dereitos:
2. Decidir sobre os asuntos da asociación, participando nas asembleas, reunións e actos para os que sexan convocados, con dereito a voz e voto, excepto os socios de honra, protectores e adheridos que non terán dereito a voto
3. Exercer e servir os cargos para os que sexan elixidos e designados.
4. Ser informados da composición dos órganos de goberno e representación da asociación, do seu estado de contas e do desenvolvemento da súa actividade.
5. Utilizar os servizos da AFG e participar nas súas actividades.
6. Ser oído con carácter previo á adopción de medidas disciplinarias contra el e ser informado dos feitos que dean lugar ás ditas medidas, debendo motivarse o acordo que, no seu caso, impoña a sanción.
7. Impugnar os acordos dos órganos da asociación que estime contrarios á lei ou ós estatutos.
8. Son obrigas dos socios:
9. Compartir as finalidades da asociación e colaborar para a súa consecución.
10. Satisfacer as cotas que se establezan e as achegas esixibles conforme os compromisos subscritos e aqueloutros que fixe a Asemblea Xeral.
11. Desempeñar os cargos para os que foron elixidos.
12. Comunicarlle á AFG datos veraces sobre a súa propiedade forestal no momento da solicitude de admisión, así como notificar calquera variación posterior.
13. Gardar confidencialidade en relación ós datos que proporcione a AFG.
14. Absterse de calquera actuación, práctica ou conduta que supoña competencia desleal coa AFG ou entidades nas que participe a asociación.
15. Acatar e cumprir os presentes estatutos e os acordos validamente adoptados polos órganos de goberno e representación da asociación.
16. Ter unha boa conduta individual e cívica.

 

Artigo 9º.- Perda da condición de socio

1. A condición de socio pérdese:
2. Por vontade propia mediante escrito á Xunta de Goberno. Considerarase tamén que ten vontade de darse baixa de socio se devolve o pagamento da cota anual por propia iniciativa.
3. Pola demora de máis dun ano no pago das cotas anuais.
4. Por incumprimento dos estatutos ou dos acordos dos órganos de goberno.
5. Por incumprimento das súas obrigas ou a realización de accións que prexudiquen gravemente os intereses da asociación, logo de expediente disciplinario, con audiencia do interesado.
6. Por falecemento da persoa física ou extinción da persoa xurídica.
7. Por deixar de cumprir os requisitos establecidos para ostentar a condición de socio nos artigos 6º e 7º dos presentes Estatutos.
8. O socio que deixara de pertencer á asociación, por calquera causa, estará suxeito ó cumprimento ou cancelación dos compromisos e obrigas que tivera contraídos no momento da súa baixa.

 

Artigo 10º.- Infraccións

Con independencia do previsto como causa de baixa poderán ser sancionadas:

1. A inexactitude ou deficiencia maliciosa nas informacións ou documentos que formulen os socios.
2. Prexudicar os intereses da asociación e o normal desenvolvemento das súas funcións, segundo os presentes estatutos.
3. A demora no cumprimento das obrigas, sempre que esta demora non sexa causa de baixa na asociación.

 

Artigo 11.- Réxime sancionador

1. A determinación das faltas e da súa gravidade, as sancións e procedemento que se vai seguir será función da Xunta de Goberno.
2. A Xunta de Goberno poderá sancionar as infraccións mencionadas, de acordo coa súa gravidade, co apercibimento por escrito ou coa suspensión nos seus dereitos por un prazo máximo de doce meses ó socio infractor.
3. A imposición de sancións ós socios esixirá en todo caso a incoación do correspondente expediente para o que se designará un instrutor nomeado pola Xunta de Goberno.

  

TÍTULO IV

DOS ÓRGANOS DE GOBERNO E DOS ÓRGANOS CONSULTIVOS

 

Artigo 12º.- Órganos de goberno

A dirección e administración da AFG serán exercidas pola Asemblea Xeral, a Xunta de Goberno, a Comisión Executiva e o presidente.

 

Artigo 13º.- Duración dos cargos

Os cargos electivos dos órganos de goberno terán unha vixencia de catro anos, aínda que poden ser obxecto de reelección.

 

Artigo 14º.- Cese dos órganos de goberno

A condición de membro dun órgano de goberno da AFG perderase por:

1. Causar baixa como socio.
2. Deixar de cumprir os requisitos esixidos para ser socio e, no caso das comunidades de montes veciñais en man común, pola perda da condición de membro da Xunta Reitora da comunidade de montes, salvo que a Xunta Reitora apoie formalmente a súa continuidade como membro do órgano de goberno da AFG.
3. Renuncia voluntaria.
4. Non cumprir as condicións esixidas para acceder ós órganos de goberno.
5. Transcurso do prazo para o que foron elixidos.
6. Acordo de cesamento adoptado por máis da metade dos socios presentes ou representados, reunidos en Asemblea Xeral Extraordinaria convocada para tal efecto.

A renuncia e o transcurso do prazo non dan lugar ó cese automático, senón que se deberá facer un efectivo traspaso de poderes con entrega de documentación e posta ó día do sucesor.

As vacantes que se puideran producir durante o mandato de calquera órgano de goberno da AFG, serán cubertas provisoriamente entre os membros do mesmo órgano de goberno ata a elección definitiva pola Asemblea Xeral. En calquera caso, a Xunta de Goberno debe estar integrada como mínimo por 5 persoas electas.

 

Artigo 15º.- A Asemblea Xeral

1. A Asemblea Xeral de socios é o órgano de expresión da vontade da asociación e estará formada por todos os integrantes desta. O presidente e o secretario da Asemblea serán tamén o presidente e secretario da Xunta de Goberno.
2. Son competencias da Asemblea Xeral Ordinaria:
3. Aprobar o plan de actividades e intervir nos asuntos da AFG, aprobar ou censurar a xestión da Xunta de Goberno e esixirlles responsabilidades, se procede ós seus membros.
4. Examinar e aprobar as contas e balances do exercicio anterior.
5. Aprobar os orzamentos de ingresos e gastos para cada exercicio.
6. Exame e aprobación das cotas.
7. Aprobar a participación, asociación ou federación con outras entidades ou asociacións, a proposta da Xunta de Goberno.
8. Resolver sobre os asuntos e propostas que someta a Xunta de Goberno, así como acordar as decisións que estime oportunas para a boa marcha da AFG.
9. Aprobar a realización de operacións de préstamo, crédito, avais, desconto comercial, anticipo de certificacións, operacións de arrendamentos financeiros (leasing) e factoring, necesarias para o desenvolvemento dos convenios de colaboración, contratos, proxectos e cumprimento dos fins da asociación a proposta da Xunta de Goberno.
10. Aprobar os cambios de domicilio social da asociación e dos locais asociativos adicionais.
11. Son competencias da Asemblea Xeral Extraordinaria:
12. Elixir e cesar os membros integrantes da Xunta de Goberno.
13. Modificar os estatutos da asociación.
14. Autorizar o alleamento, gravame ou hipoteca de bens sociais.
15. Solicitar a declaración de utilidade pública da asociación.
16. Aprobar o regulamento de réxime interno da asociación.
17. Acordar a disolución da asociación.
18. Designar os liquidadores.
19. As que sendo de competencia da Asemblea Xeral Ordinaria, por razóns de urxencia ou necesidade, non poidan esperar á súa convocatoria sen grave prexuízo para a AFG.

 

Artigo 16º.- Clases e convocatoria da Asemblea Xeral

As reunións da Asemblea Xeral serán ordinarias e extraordinarias.

1. A Asemblea Xeral Ordinaria reunirase unha vez ó ano, dentro dos seis primeiros meses de cada exercicio.
2. A Asemblea Xeral Extraordinaria reunirase cantas veces o acorde a Xunta de Goberno, ou o soliciten polo menos o 10% dos socios con dereito a voto. Neste último caso realizarase por medio de escrito dirixido ó presidente, autorizado coas firmas dos solicitantes, no que se expoña o motivo da convocatoria e a orde do día.
3. Tanto a Asemblea Ordinaria como a Extraordinaria serán convocadas con un mínimo de 15 días de antelación polo presidente da Xunta de Goberno, indicando como mínimo, a data, hora e lugar da reunión, se é a primeira ou a segunda convocatoria, entre as que mediará polo menos media hora, e expresará con claridade e precisión os asuntos que compoñen a orde do día.
4. A Asemblea Xeral, calquera que sexa o seu carácter, só poderá tratar aquelas cuestións previstas incluídas na orde do día.
5. Tanto para as asembleas ordinarias como para as extraordinarias, a notificación farase nos locais da asociación e no domicilio dos socios que figure na base de datos da asociación ou no enderezo electrónico que se facilite.

 

Artigo 17º.- Funcionamento da Asemblea Xeral

1. A Asemblea Xeral quedará validamente constituída sempre que concorran a metade máis un dos socios con dereito a voto na primeira convocatoria ou, transcorrida media hora en segunda convocatoria, con calquera número de asistentes pero, en todo caso, coa presenza do presidente ou vicepresidente e o secretario ou persoa que o substitúa.
2. Todo socio, agás os socios os que fai referencia o artigo 7º dos Estatutos, ten dereito a un voto, que poderá exercer persoalmente ou por medio de delegación. A delegación de voto só lle poderá ser conferida a unha persoa física socia da AFG ou a representante de persoa xurídica socia da AFG. A acreditación farase ante o secretario, por escrito e con carácter previo á celebración da asemblea, mostrando a delegación de voto asinada polo socio representado, acompañada da fotocopia do seu DNI e o DNI orixinal do representante. Cada socio ou persoa física só poderá exercer unha única delegación.
3. Os acordos adoptados deberán selo polo voto afirmativo da maioría simple dos asistentes ou representados con dereito a voto coas seguintes excepcións:
4. Requirirase o voto favorable de máis da metade dos asistentes ou representados para o especificado no apartado g do punto 2 e para os apartados b, c, d, e do punto 3 do artigo 15º.
5. Será necesario o voto favorable dos 2/3 dos asistentes ou representados para os apartados f, g do punto 3 do artigo 15º.
6. Os acordos adoptados conforme os preceptos anteriores obrigarán a todos os socios, incluso os non asistentes.
7. As sesións abriranse cando así o determine o presidente. Seguidamente procederase, por parte do secretario, a comprobar e anotar os votos delegados e de seguido lerá a acta da asemblea anterior. A continuación presentaranse os puntos da orde do día, procedéndose ó debate e á aprobación dos correspondentes acordos nos termos contidos nestes estatutos segundo a materia de que se trate.
8. De cada sesión da Asemblea Xeral levantarase acta subscrita polo secretario e o presidente, que especificará o número de asistentes, a orde do día, lugar e hora, as principais deliberacións e o contido dos acordos adoptados.
9. Os socios discrepantes poderán formular voto particular por escrito que se incorporará á acta.
10. As actas aprobaranse pola maioría dos presentes con dereito a voto na mesma ou na seguinte sesión da Asemblea Xeral, en todo caso, o secretario poderá emitir certificacións sobre os acordos adoptados, sen prexuízo da posterior aprobación da acta.
11. As votacións poderán ser realizadas a man alzada, por votación nominal, por votación secreta ou por asentimento unánime. A forma de votación será decidida polo presidente.
12. Os acordos que vaian contra estes estatutos ou infrinxan os fins da asociación poderán ser recorridos en reposición diante da Asemblea Xeral. A partir da resolución do recurso de reposición quedará expedita a vía para recorrer diante a xurisdición ordinaria.

 

Artigo 18º.- A Xunta de Goberno

A Xunta de Goberno é o órgano que ten ó seu cargo o goberno, xestión e administración da AFG.

1. A Xunta de Goberno estará formada polo presidente da AFG, tres vicepresidentes, e un número de vogais non superior a dezaseis.
2. Formarán tamén parte da Xunta de Goberno, con voz pero sen voto, o director da AFG e os cargos directivos que no seu caso acorde a Xunta de Goberno.
3. O secretario e o tesoureiro serán elixidos de entre os membros da Xunta de Goberno.
4. Os cargos que compoñen a Xunta de Goberno serán desempeñados de forma gratuíta, sen prexuízo do dereito a ser reembolsados dos gastos debidamente xustificados en que poidan incorrer por actuacións relacionadas coa asociación.
5. Os membros da Xunta de Goberno serán elixidos pola Asemblea Xeral. A súa duración será por un período de catro anos, aínda que poden ser obxecto de reelección.
6. A Xunta de Goberno ten as seguintes atribucións:
7. Cumprir e facer cumprir as disposicións dos presentes estatutos e os acordos validamente adoptados polos órganos de goberno da AFG.
8. Resolver os procedementos da adquisición e perda da condición de socio.
9. Programar e dirixir as actividades asociativas.
10. Levar a xestión administrativa e económica da asociación.
11. Someter a aprobación da Asemblea Xeral o orzamento anual de ingresos e gastos, así como o estado de contas do ano anterior.
12. Propoñerlle o plan de actividades da asociación á Asemblea Xeral para a súa aprobación, impulsando e dirixindo as súas tarefas.
13. Elixir de entre os seus membros as persoas que integren a Comisión Executiva.
14. Designar os representantes da AFG ante calquera outra organización asociativa e organismos públicos e privados.
15. Nomear secretario e tesoureiro.
16. Nomear o director e os demais cargos directivos da AFG, fixando as súas funcións e competencias.
17. Instruír e resolver os expedientes disciplinarios.
18. Fixar o número de vogais da Xunta de Goberno que vaian ser elixidos en Asemblea Xeral.
19. Constituír a Comisión Electoral e designar os socios que formarán parte dela.
20. Convocar e fixar a data da Asemblea Xeral.
21. Propoñerlle á Asemblea Xeral a fixación de cotas ordinarias e extraordinarias para os socios.
22. Designar as comisións de traballo ou seccións que se estimen oportunas para o bo funcionamento da asociación que deberán ser presididas polos membros da Xunta de Goberno co fin de delegar nelas a preparación de determinados actos ou actividades ou de acadar delas as informacións necesarias.
23. Ditar normas interiores de organización e aprobar os actos e contratos e exercer cantas funcións, dereitos e accións non estean expresamente asignadas á Asemblea Xeral.
24. Aprobar as achegas da AFG a outras entidades.
25. Aquelas que non veñan atribuídas expresamente a outro órgano da asociación, e as que lle asigne a Asemblea Xeral.

 

Artigo 19º. Funcionamento da Xunta de Goberno

1. A Xunta de Goberno reunirase polo menos dúas veces ó ano, logo de convocatoria do presidente ou sempre que o solicite, polo menos, a metade máis un dos seus compoñentes. Os membros da Xunta de Goberno poderán delegar a súa representación noutro membro electo do propio órgano.
2. Para a válida constitución do órgano, para celebrar as sesións, deliberacións e toma de acordos, será necesaria a participación, polo menos, da metade máis un dos seus membros (presentes ou representados) e, en todo caso, do presidente ou vicepresidente que o substitúa e o secretario ou persoa que o substitúa.
3. Os acordos serán adoptados pola maioría de votos dos asistentes presentes ou representados. O secretario ou, no seu defecto, quen o substitúa, levantará acta de cada sesión.
4. Correspóndelles ós membros da Xunta de Goberno:
5. Recibir, coa antelación mínima de vinte e catro horas, as convocatorias coa orde do día das reunións.
6. Participar nos debates e sesións, exercer o seu dereito ó voto e a formular voto particular.
7. Obter a información precisa para cumprir as funcións asignadas.

 

Artigo 20º.- A Comisión Executiva

A Comisión Executiva ten as competencias seguintes:

1. A dirección da asociación, sen prexuízo das atribucións da Xunta de Goberno.
2. A asistencia ó presidente no exercicio das súas funcións de xestión e representación.
3. O seguimento das actuacións realizadas e dos acordos ou decisións adoptados polos demais órganos de goberno.
4. Formar a Mesa da Asemblea Xeral.
5. Propoñerlle á Xunta de Goberno a estrutura organizativa da AFG.
6. A adopción de acordos en materia de persoal técnico e administrativo.

A Comisión Executiva reunirase cantas veces a convoque o presidente da Xunta de Goberno, ou polo menos un número de membros non inferior a un terzo do total desta.

 

Artigo 21º.- O presidente

1. No presidente concorre a alta representación da entidade.
2. Correspóndelle ó presidente da asociación:
   1. Representar a asociación en todos os actos e contratos que se celebren, así como ante as autoridades, departamentos da Administración, tribunais, entidades privadas e persoas individuais.
   2. Presidir as sesións, moderar o desenvolvemento dos debates e, no seu caso, suspendelo cando concorra causa debidamente xustificada de calquera dos órganos de goberno da asociación.
   3. Cumprir e facer cumprir os presentes estatutos, os acordos validamente adoptados, as normas legais e regulamentarias.
   4. Levar a sinatura social.
   5. Supervisar as actividades da entidade.
   6. Ordenar os gastos e autorizar os pagos nos casos en que esta facultade non estea expresamente atribuída a outro órgano ou directivo da AFG.
   7. Outorgar, de conformidade coa Xunta de Goberno, os poderes precisos para seguir procedementos e exercitar dereitos e accións.
   8. Visar as actas e os certificados dos acordos dos órganos de goberno.
   9. Cantas outras funcións sexan inherentes á súa condición.

 

Presidente de honra

A Asemblea Xeral, a proposta da Xunta de Goberno, poderá nomear presidente de honra da AFG a aquela persoa física que reúna os méritos para tal distinción en recoñecemento da súa contribución á silvicultura galega e ó seu apoio á Asociación Forestal de Galicia. No presidente de honra recaerán as funcións de representación honorífica da Asociación Forestal de Galicia que lle encomende a Xunta de Goberno. O presidente de honra, nos actos oficiais da AFG, ocupará protocolariamente, o lugar máis destacado.

 

Artigo 22º.- Os vicepresidentes e os vogais

1. Os vicepresidentes:
2. Formarán parte da Xunta de Goberno tres vicepresidentes: de montes veciñais en man común, de montes particulares, en representación dos seus respectivos colectivos e un terceiro de relacións institucionais.
3. No caso de ausencia, enfermidade, renuncia, falecemento ou cando, por calquera outra causa, faltase ou estivese temporalmente vacante o cargo de presidente, exercerá as súas funcións o vicepresidente de relacións institucionais e, no seu defecto, o vicepresidente de máis idade.
4. Os vicepresidentes poderán exercitar as funcións de representación da AFG que lles sexan conferidas por delegación expresa do presidente.
5. Os vogais terán as seguintes atribucións:
6. Formarán parte da Xunta de Goberno ata un máximo de 16 vogais.
7. Poderán realizar programas e propostas na súa área de actuación.
8. Desempeñarán os traballos que lle sexan encomendados pola Xunta de Goberno.

 

Artigo 23º.- O secretario

Correspóndelle ó secretario:

1. Recibir e tramitar as solicitudes de ingreso.
2. Levar o ficheiro e o libro de rexistro de socios.
3. Dirixir os traballos administrativos da entidade.
4. Recibir as comunicacións dos membros da Xunta de Goberno e da Asemblea Xeral.
5. Responsabilizarse do arquivo de todos os documentos relativos á asociación, así como de rexistros, ficheiros e bases de datos.
6. Executar ou notificar as convocatorias das reunións das Asembleas Xerais e da Xunta de Goberno por orde do presidente.
7. Redactar as actas das asembleas e da Xunta de Goberno autorizándoas coa súa sinatura e o visto e prace do presidente, coidando da súa custodia.
8. Expedir as certificacións dos acordos adoptados co visto e prace do presidente.
9. Levar o inventario dos bens da asociación.

 

Artigo 24º.- O tesoureiro

1. Correspóndelle ó tesoureiro:
2. Custodiar os fondos pertencentes á asociación.
3. Darlles cumprimento ás ordes de pagamento que expide o presidente.
4. Levar a contabilidade da asociación.
5. Verificar os ingresos e os pagamentos.
6. Elaborar o borrador de orzamento, así como as contas de resultados e balances.
7. O tesoureiro ten a obriga de proceder ó peche do exercicio orzamentario co fin de que as contas estean á disposición dos membros da asociación 15 días antes da celebración da Asemblea Xeral Ordinaria.

 

Artigo 25º.- Órganos consultivos: consellos das comunidades de montes e consellos dos silvicultores

1. Os consellos terán carácter consultivo para axustar e facilitar o desenvolvemento das actuacións da AFG.
2. Dentro de cada provincia poderase constituír un “consello” integrado por representantes de comunidades titulares de montes veciñais en man común e outro de propietarios de montes particulares, todos eles socios da AFG. O primeiro recibe o nome de “Consello das Comunidades de Montes” e o segundo “Consello dos Silvicultores”.
3. Para que poida constituírse un consello das comunidades de montes, serán necesarias polo menos trinta comunidades socias da AFG da mesma provincia.
4. Os consellos dos silvicultores esixe para a súa válida constitución un número mínimo de 200 socios da mesma provincia, propietarios de montes particulares.
5. O ámbito territorial de cada consello que poida constituírse no seo da AFG será provincial.

 

Artigo 26º.- Organización dos consellos

1. Cada consello estará integrado por:
2. Os delegados elixidos para formar cada consello.
3. O presidente da AFG ou persoa en quen este delegue.
4. Un director técnico da AFG.
5. Os delegados dos consellos das comunidades de montes serán elixidos polos representantes das comunidades socias da AFG. Un por comarca nas que exista un mínimo de dez comunidades de montes veciñais socias, segundo as comarcas recoñecidas pola Xunta de Galicia.
6. Os membros dos consellos das comunidades de montes serán os representantes dunha comunidade que as xuntas reitoras designen en cada caso.
7. Os delegados dos consellos dos silvicultores serán elixidos polos socios da AFG de cada comarca nas que existan mínimo de 30 socios.
8. O cargo de delegado terá unha vixencia de catro anos, podendo ser reelixidos de forma sucesiva. Terán como funcións recoller as demandas, problemas e intereses dos socios da AFG e trasladalos ó consello, así como coordinar as demandas de actividades da AFG na zona pola que foi elixido para o cargo.

 

Artigo 27.- Competencias e funcionamento dos consellos das comunidades de montes e dos consellos dos silvicultores

1. Son competencias dos consellos:
2. Estudar e analizar os problemas que afectan os montes no seu ámbito territorial.
3. Poñer en coñecemento da Xunta de Goberno da AFG cantas cuestións estimen de interese para os socios, así como as solucións que presentan estas.
4. Desenvolver e coordinar a actividade da AFG no seu ámbito territorial respectivo.
5. Propoñerlle á Xunta de Goberno as actuacións da AFG no seu ámbito territorial.
6. Intercambiar información cos directivos da AFG e cos representantes da oficina daquela no seu ámbito territorial.
7. Convocar ás reunións que estimen convenientes a todos os socios da súa demarcación.
8. En ningún caso as actuacións ou decisións adoptadas polos consellos poderán contradicir, nin opoñerse, ás decisións dos órganos de goberno da AFG.

  

TÍTULO V

DO PROCEDEMENTO ELECTORAL

 

Artigo 28º.- Convocatoria de eleccións

1. As eleccións a cargos da Xunta de Goberno da AFG serán convocadas polo presidente da AFG cun mes de antelación á data de celebración das respectiva eleccións.
2. As eleccións a delegados dos consellos das comunidades de montes e dos consellos dos silvicultores, alí onde os houbera, celebraranse ó vencemento do seu mandato e serán convocadas polo presidente da AFG.
3. O procedemento para a elección destes delegados será regulado pola Xunta de Goberno.

 

Artigo 29º.- Candidaturas

1. As listas cos candidatos a membros da Xunta de Goberno serán pechadas. Cada candidatura especificará os nomes propostos para os cargos de presidente, vicepresidente de relacións institucionais, vicepresidente de comunidades de montes veciñais, vicepresidente de montes particulares e os correspondentes vogais que fixe a Xunta de Goberno en cada caso.
2. As listas a delegados dos consellos da AFG serán abertas.
3. Os cargos da Xunta de Goberno serán elixidos polos socios da AFG con dereito a voto en Asemblea Xeral Extraordinaria convocada para o efecto.
4. Se no prazo previsto non se presentase ningunha candidatura, a Asemblea Xeral Extraordinaria convocada para o efecto celebrarase igualmente para decidir sobre a convocatoria dun novo proceso electoral e a confirmación, se así se considera, da Xunta de Goberno existente mentres non se realice unha nova elección.

 

Artigo 30º.- Comisión Electoral

Para a elección da Xunta de Goberno, en cada período electoral, constituirase unha Comisión Electoral de tres membros que serán nomeados pola Xunta de Goberno.

1. A Comisión Electoral terá os seguintes cometidos:
   1. Velar polo cumprimento da normativa electoral.
   2. Constituír a Mesa Electoral.
   3. Resolver no prazo de vinte e catro horas, en días hábiles, os recursos que se produzan en relación cos procesos electorais.
   4. Examinar e proclamar as candidaturas.
2. Poderá formar parte da Comisión Electoral calquera socio da AFG que non se vaia presentar como candidato á Xunta de Goberno no proceso electoral que se convoca.
3. A Comisión Electoral constituirase no prazo de tres días hábiles dende que se inicie o proceso electoral por decisión da Xunta de Goberno. Elixirán de entre eles un presidente.
4. As candidaturas, completas para cubrir todos os postos da Xunta de Goberno fixados na convocatoria electoral, presentaranse ante a Comisión Electoral cun mínimo de sete días de antelación á data de elección fixada. Cada candidatura nomeará un interventor que será o interlocutor coa Comisión Electoral.
5. Examinadas as candidaturas e resoltas as alegacións que no seu caso se puideran producir, a Comisión Electoral realizará as actuacións necesarias para o desenvolvemento do proceso electoral con todas as garantías democráticas.

 

Artigo 31º.- Votación e escrutinio

1. Para a elección da Xunta de Goberno, constituirase unha mesa electoral media hora antes do comezo da votación, formada polos membros da Comisión Electoral e os interventores de cada candidatura presentada.
2. As eleccións realizaranse mediante votación secreta utilizando para o efecto papeletas formalizadas para cada candidatura que incluirá os nomes propostos para cada cargo da Xunta de Goberno.
3. O exercicio do dereito de votación esixirá a acreditación da identidade de cada votante e da súa condición de socio da AFG.
4. Unha vez depositados os votos na urna procederase á súa apertura e á realización do escrutinio. O presidente da Comisión Electoral sacará as papeletas unha a unha e lerá en voz alta a candidatura votada, mostrándolles a papeleta ós membros da Mesa Electoral. Realizado o reconto, e tendo en conta os votos nulos e en branco, levantarase acta do escrutinio que deberán asinar todos os membros da mesa e proclamarase de viva voz o resultado do escrutinio ante a asemblea.

  

TÍTULO VI

DO RÉXIME ECONÓMICO

 

Artigo 32º.- Patrimonio, recursos e contas da AFG

1. O patrimonio da AFG estará integrado por toda clase de bens, dereitos, accións e participacións, sen máis limitacións que as establecidas polas leis.
2. Os recursos económicos da AFG procederán de:
3. As cotas de inscrición, as cotas periódicas ordinarias e as extraordinarias, así como as achegas dos socios.
4. Os rendementos dos servizos que presta a AFG.
5. Os derivados da organización de cursos, congresos, seminarios, xornadas e actividades, así como da venda de publicacións.
6. Os xerados por estudos e proxectos de investigación e cooperación.
7. As axudas, subvencións e doazóns.
8. Os produtos, dereitos e dividendos derivados do seu patrimonio e das súas participacións sociais.
9. Calquera outro que se axuste á legalidade.
10. O peche do exercicio económico coincidirá co do ano natural.
11. O informe económico anual incluirá un orzamento anual con partidas diferenciadas de ingresos e gastos. O borrador do orzamento será elaborado polo tesoureiro da asociación que deberá telo preparado con antelación suficiente para que poida ser aprobado na Asemblea Xeral Ordinaria.
12. Anualmente, con referencia ó ultimo día do exercicio económico de cada ano, elaboraranse as contas que se formalizarán nunha memoria que será posta á disposición dos socios durante un prazo non inferior a 15 días ó sinalado para a celebración da Asemblea Xeral Ordinaria, que deberá aprobalas ou censuralas.
13. O orzamento económico de cada ano será tamén sometido a consideración da Asemblea Xeral Ordinaria.
14. Para a disposición de fondos das contas que a asociación ten nas entidades bancarias serán necesarias dúas sinaturas conxuntas, do presidente ou vicepresidente que o substitúa, e da persoa ou persoas que designe a Xunta de Goberno.

 

Artigo 33º.- Regulación das cotas

A Asemblea Xeral Ordinaria, a proposta da Xunta de Goberno, aprobará tanto as cotas ordinarias como as extraordinarias que non serán reintegrables en ningún caso. O recadado dedicarase a atender as necesidades da asociación.

 

Artigo 34º.- Responsabilidade da AFG e dos socios

1. A asociación, para todos os efectos, e especialmente nas súas relacións con terceiros, por razón das operacións con eles concertadas, .responderá cos seus bens presentes e futuros.
2. Como entidade sen ánimo de lucro, en ningún caso poderán ser distribuídos entre os socios os recursos obtidos pola asociación.

  

TÍTULO VII

DA MODIFICACIÓN DE ESTATUTOS

 

Artigo 35º.- Modificación de estatutos

Os presentes estatutos só poderán ser modificados en Asemblea Xeral Extraordinaria convocada para tal efecto, por acordo adoptado co voto favorable de máis da metade dos socios con dereito a voto presentes ou representados. A proposta de convocatoria deberá ir acompañada do texto das modificacións propostas.

 

 

TÍTULO VIII

DA DISOLUCIÓN DA ASOCIACIÓN

 

Artigo 36º.- Disolución

A AFG disolverase voluntariamente ou por algunha das causas previstas na normativa vixente.

 

Artigo 37º.- Procedemento de disolución

A disolución da asociación, a proposta da Xunta de Goberno, só poderá ser acordada pola Asemblea Xeral Extraordinaria convocada para tal efecto mediante o voto favorable dos dous terzos dos votos presentes ou representados.

 

Artigo 38º.- Liquidación

1. Acordada a disolución, a Asemblea Xeral Extraordinaria designará tres socios liquidadores, que xunto co presidente e co tesoureiro, procederán a efectuar a liquidación dos bens, pagando débedas, cobrando créditos e fixando o haber líquido resultante.
2. O haber resultante unha vez efectuada a liquidación, doarase a outra asociación non lucrativa e inscrita na comunidade autónoma.
3. O xustificante da doazón será presentado no Rexistro de Asociacións correspondente para proceder á inscrición da disolución da asociación.

 

 

TÍTULO IX

RÉXIME INTERNO

 

Artigo 39º.- Regulamento  de réxime interno

O regulamento de réxime interno, no seu caso, desenvolverá aquelas materias non contempladas directamente nos presentes estatutos, como o procedemento disciplinario, non podendo ir en ningún caso en contra do estipulado neles. En todo caso, o funcionamento interno da asociación estará sometido ó ordenamento xurisdicional civil.

 

 

DISPOSICIÓN ADICIONAL

Todas as cuestións e controversias derivadas da interpretación, aplicación e execución do regulado nos presentes estatutos sométense ós xulgados e tribunais de Santiago de Compostela.

  

DISPOSICIÓN TRANSITORIA

A composición e estrutura dos órganos de goberno da AFG manteranse ata a finalización do actual período de mandato dos seus integrantes, sen prexuízo da incorporación dos cargos e do persoal directivo nos termos previstos nos presentes estatutos.

 

DISPOSICIÓN FINAL

Os presentes estatutos entrarán en vigor ó día seguinte da súa aprobación pola Asemblea Xeral Extraordinaria convocada para o efecto.

 

2018. Juan Ramón Gallástegui, na súa calidade de secretario da Asociación Forestal de Galicia, fai constar que estes estatutos foron modificados en Asemblea Xeral Extraordinaria celebrada en Vilagarcía de Arousa o 26 de maio de 2018.

 

Vilagarcía de Arousa, 26 de maio de 2018