Número e características

O número de montes veciñais en Galicia é elevado, atopándose en constante aumento a medida que se van clasificando novos montes. A finais do ano 2018 había un total de 3.312 montes veciñais en man común clasificados nas catro provincias galegas.

A distribución dos montes veciñais polo territorio galego non é uniforme, nin no seu número nin na súa superficie, atopándose tanto zonas nas que a maioría da superficie forestal está formada por este tipo de propiedade como outras onde a súa presenza é mínima. Se se contempla a súa distribución a nivel provincial, destaca Ourense onde se atopan case o 38 % dos montes veciñais de toda Galicia (1.258 montes no ano 2018). No polo contrario atópase a provincia da Coruña, onde nese ano estaban clasificados só 297 montes veciñais.

No ano 2018, a superficie media dos montes veciñais en Galicia superaba lixeiramente as 200,55 hectáreas. A superficie media dos montes veciñais de Lugo e Ourense situábase arredor das 220 hectáreas mentres que os da Coruña e Pontevedra eran algo menores, arredor das 160 hectáreas.

—-

[1] Con dúas excepcións a esta característica: a expropiación e a permuta.

[2] Moitos montes veciñais de Galicia (sobre todo nas provincias de Lugo e Ourense) foron obxecto de división ou reparto en “sortes” ou “tenzas”, como se se tratase de parcelas particulares, división que é ilegal aos efectos de adquisición da propiedade polo que, con independencia do tempo que pasase dende ese reparto, segue sendo monte veciñal.