And he will

A poda, traballo fundamental para a obtención de madeira de calidade

Conseguir unha madeira de calidade depende de moitos factores que comezan cando eliximos o sitio da plantación, a especie, a planta, o método de plantación… pero, fundamentalmente, de levar a cabo un programa de podas axeitado. Podar no momento oportuno, na época axeitada, cunha ferramenta apropiada e cuns cortes ben dados é fundamental para producir boa madeira de calquera especie.

Pódense consultar os seguintes videotitoriais que resumen as técnicas da poda en coníferas e en frondosas:

Videotitorial sobre poda de coníferas en galego nitens en castellano

Videotitorial sobre poda de frondosas en galego nitens en castellano

Videotitorial sobre poda de castiñeiro para froito en galego nitens en castellano

Épocas de poda

Ata hai uns anos aceptábase como época axeitada e xeneralizada para podar os meses do inverno. Nos últimos anos a investigación constatou que non sempre esta época era a mellor, de feito, case para todas as especies forestais é moito máis axeitada unha época diferente. As podas no inverno, e nunha época húmida en xeral, teñen o risco de que os cortes quedan abertos ata que na primavera coa subida do zume comezan, a pechar, co que se expón a árbore durante moito tempo a que pola ferida penetren todo tipo de patóxenos. Esta é a razón principal pola que se recomenda retraer a poda a épocas máis benignas.

Épocas de poda recomendables

Especie	Época de poda
Bidueiro (Betula sp.)	Entre maio e agosto
Carballo americano (Quercus rubra)	Finais do inverno xusto antes de que abrolle ou ben en xullo e agosto
Carballo do país (Quercus robur)	Entre xullo e agosto
Castiñeiro (Castanea sp.)	Cando comeza a abrollar, entre o 15 de marzo e o 15 de abril
Cerdeira (Prunus sp.)	Entre xuño e xullo
Chopo (Populus sp.)	Inverno, e repaso de ladróns no verán
Eucalipto (Eucalyptus sp.)	Preferiblemente na primavera
Freixo (Fraxinus sp.)	Entre xuño e agosto
Nogueira (Juglans sp.)	Mediados de xuño-mediados de xullo, na primavera antes de abrollar ou incluso en agosto ou setembro
Piñeiro de Oregón (Pseudotsuga menziesii)	Verán
Piñeiro do país (Pinus pinaster)	Con tempo seco nos meses de calor
Piñeiro insigne (Pinus radiata)	Con tempo seco nos meses de calor
Pradairo (Acer sp.)	Inverno, primavera ou verán
Sequoia (Sequoia sp.)	Verán

Maneira de realizar a poda

Ao longo da quenda de produción dunha especie, hai que levar a cabo dous tipos de podas: a poda de formación nos 10 primeiros anos e a poda de calidade, que pode rematar aos 20 anos nalgunhas especies.

Os obxectivos da poda de formación son:

• Conseguir unha guía única e vertical.
• Podar as pólas máis grosas e moi vigorosas.
• No caso das frondosas, recepar as plantas mal formadas ou danadas. Non hai que temer aos recepes, feitos ao seu debido tempo no momento oportuno, son a mellor solución para conseguir substituír unha planta torta e mal formada por un fuste dereito sen nós.

Os obxectivos da poda de calidade son:

• Conseguir tres ou seis metros de tronco sen nós.
• Podar pólas de 3 cm de groso como máximo.

Para isto hai que facer sempre:

• Cortes limpos a carón do fuste.
• Empregar ferramentas axeitadas.
• Desinfectar as ferramentas nos casos de máximo risco e valor da plantación.

Tan necesario é podar como non podar en demasía. Como norma xeral recoméndase que ten que estar podado 1/3 da altura da árbore. A poda excesiva ocasiona a ralentización do crecemento da árbore (ao deixala sen moita folla ten máis dificultades para alimentarse) e nalgunhas especies provoca a aparición de rebentos epicórmicos na parte do tronco podado.

Unha das claves dunha boa poda é facela no momento oportuno, en pólas que teñan menos de 3 centímetros de diámetro. Podar pólas que excedan de 5 cm de diámetro na inserción do tronco non ten moito sentido, xa que o dano que produciu na madeira xa non ten solución co que o único que se consegue é gastar cartos e esforzos sen ningún resultado positivo.