Forest management
A Asociación Forestal de Galicia a través da súa empresa de servizos Selga, Compañía Galega de Silvicultores, S.L., ofrece aos seus asociados a posibilidade xestionar as súas propiedades forestais.
Este servizo préstase logo dun contrato de xestión entre a propiedade e Selga e implica o desenvolvemento e control dos traballos programados no proxecto de ordenación ou plan simple de xestión do monte ou montes a xestionar e comprende tres pasos fundamentais:
Redacción do plan anual de actuacións
Recollendo as actuacións previstas no proxecto de ordenación ou plan simple de xestión ou as indicacións da propiedade, os técnicos da AFG-Selga elaborarán o plan anual de actuacións de cada monte:
No plan anual especificaranse os traballos a realizar durante o ano coas unidades de obra medidas, un orzamento orientativo e unha data prevista de execución.
Este plan anual presentarase no primeiro mes do ano e será aprobado pola propiedade.
Non se realizará ningún traballo que non estea contemplado no plan de actuacións e non conte coa conformidade da propiedade.
Os traballos extraordinarios ou urxentes serán comunicados á propiedade, que dará a súa conformidade antes do seu inicio ou contratación e estudarase a forma de acometelos o máis rápido posible.
Revisarase o plan de actuacións trimestral ou semestralmente, en función dos traballos programados e resultados obtidos.
Orzamentos, execución dos traballos e dirección de obra
Para a execución de cada unidade de obra detallada no plan anual de actuacións solicitarase orzamento detallado a varias empresas. A empresa contratista indicará os prezos unitarios e os de cada unidade de obra. Non se aprobará ningún orzamento que non contemple os prezos unitarios dos traballos (a propiedade resérvase o dereito de solicitar outros orzamentos)..
Aprobado pola propiedade o orzamento, redactarase un contrato entre a empresa contratista e a propiedade para a execución dos traballos. Non se iniciarán os traballos ata que o contrato estea asinado.
Antes de comezar os traballos, AFG-Selga indicará á empresa contratada as características das obras e traballos e resolverá as dúbidas que se puideran formular. Para a correcta execución dos traballos, técnicos da AFG-Selga efectuarán visitas de supervisión, ben por indicación da propiedade, ben porque a complexidade dos traballos o requira.
A empresa que realice os traballos comunicará á propiedade e a AFG-Selga o comezo dos mesmos e técnicos da AFG-Selga poderán estar presentes ao comezo da obra se se considera necesario.
Certificación do traballo
Unha vez finalizados os traballos, técnicos da AFG-Selga recoñecerán en monte as obras e actuacións executadas, realizarán as medicións necesarias e a valoración da calidade dos traballos realizados.
Recoñecido o traballo polo técnico da AFG-Selga, emitirase certificación de final de obra. Esta certificación incluirá:
- A cuantificación dos traballos segundo unidade de obra
- A valoración dos traballos segundo unidade de obra
- As posibles incidencias ou modificacións se as houber
A certificación de final de traballos será enviada por AFG-SELGA á propiedade para recibir a súa conformidade.
Unha vez recibida a conformidade da propiedade, a empresa facturará o realmente executado de acordo coa certificación practicada e cos prezos unitarios establecidos no orzamento aprobado.
As certificacións poderanse realizar mensualmente ou pola totalidade do traballo, en función da superficie de actuación.