Actos de disposición

Actos de disposición

As comunidades de montes poden aproveitar os recursos que se xeran no monte tanto de xeito directo como cedendo o goce dos mesmos a terceiras persoas. Neste último caso, a comunidade aparece coma un suxeito máis dentro do tráfico mercantil, véndose obrigada a subscribir contratos co resto de axentes, cuestión para a que ten plena capacidade de obrar. É dicir, as comunidades de montes contan con capacidade de contraer legalmente dereitos e obrigas con terceiros.

A decisión de subscribir estes contratos é da Asemblea Xeral, quen ademais deberá de aprobar os seus condicionantes, respectando sempre as maiorías esixidas na normativa en vigor e nos seus estatutos. Entre as diversas cuestións que deben ser acordadas pola Asemblea Xeral, pódese destacar tanto a duración do contrato como o tipo de contraprestación a recibir por esa cesión.

Nos estatutos da comunidade tamén pode quedar modulado o xeito en que a mesma se organiza para operar no tráfico mercantil. Non poderá esixirse á comunidade o establecido en calquera contrato se se subscribiu sen respectar o marcado nos estatutos ou se se excede o alí establecido. Nestes casos, o terceiro afectado podería, de ser o caso, pedir danos e prexuízos aos membros da comunidade que fixeran ese contrato que non se axustase aos seus estatutos.

Agora ben, como consecuencia das características propias dos montes veciñais en man común, e en concreto a súa inalienabilidade ou intransmisibilidade, a lexislación reguladora dos montes veciñais sinala que tipo de contratos poden subscribir as comunidades de montes e que son os seguintes:

1. A cesión
2. O dereito de superficie
3. O arrendamento

Por outra parte, existen tres excepcións previstas legalmente á inalienabilidade dos montes veciñais:

1. As permutas
2. A expropiación forzosa
3. A concentración parcelaria

Por último, tamén pode darse o caso de que existan ocupacións e servidumes no monte veciñal que limiten a libre disposición do mesmo para o resto de comuneiros.

Todos os actos de disposición deben ser aprobados en Asemblea Xeral, en convocatoria expresa e con maioría cualificada, precisando o voto favorable da maioría dos presentes e sempre que eses votos favorables representen, polo menos, o 50 % do censo de comuneiros en primeira convocatoria ou o 30 % en segunda.

Os actos de disposición estarán sempre formalizados en escritura pública, remitíndose copia da mesma á sección provincial do Rexistro de Montes Veciñais en Man Común, xunto coa documentación que sexa precisa (licenza de obras, autorización, etc.).

É imprescindible achegar plano topográfico da superficie que se vaia a ceder, con perfecta identificación das estremas da parcela ou parcelas.

É preciso tamén incluír nos contratos de cesión, dereito de superficie ou arrendamento, unha cláusula que esixa á outra parte a subscrición dun seguro de responsabilidade civil que cubra amplamente os danos e prexuízos que poida causar a actividade que se vaia a desenvolver na parcela tanto á comunidade propietaria como a terceiros.

Os actos de cesión, permuta, servidume, expropiación e dereitos de superficie poden inscribirse no Rexistro da Propiedade