En marcha o Grupo Operativo Resinerxia
Nos últimos meses púxose en marcha o Grupo Operativo Resinerxia- Accións de cooperación para o desenvolvemento do sector resineiro, do que forma parte a Asociación Forestal de Galicia xunto coas empresas Xagoaza Pinaster S.L. e Sinergias Sostenibles Resiforest S.L., a Universidade de Vigo, a Axencia Galega de Calidade Alimentaria e a Comunidades de Montes de Baroña.
O obxectivo deste grupo operativo é coordinar os axentes do sector resineiro de Galicia para mobilizar o recurso nos montes galegos. Para o que se pretende poñer a punto unha metodoloxía de aproveitamento resineiro mecanizado con trade circular adaptado aos montes galegos, na que quede definida a operativa de traballo, os rendementos deste método, o tamaño mínimo da mata de traballo e a súa rendibilidade.
Paralelamente estimarase o potencial resineiro dos piñeirais de Pinus pinaster de Galicia, o que axudará aos propietarios forestais coñecer o valor resinable do voo dos seus montes, abrindo a posibilidade de compatibilizar o aproveitamento resineiro co madeireiro.
Asemade deseñarase unha trade específica para o uso resineiro que permita realizar os traballos de campo con maior celeridade e menor esforzo, o que se espera que mellore a calidade do oficio resineiro para facelo unha atractiva opción profesional.
O proxecto instalará parcelas de ensaio nas catro provincias galegas, que servirán de banco de datos dos estudos que se pretenden executar.
Para isto cóntase cun orzamento total de pouco máis de 173.000 euros a executar ata 2024 financiadas a conta das axudas para a execución de proxectos dos grupos operativos da Axencia Europea de Innovación.